Tunisassiat ataatsimut nalingat (BNP) inuiaqatigiinni tunisassiarineqartut nalingannut uuttuutaavoq. Tunisassiornerup tamarmiusup nalinga naatsorsuutinut ilanngunneqartarpoq, inuussutissarsiutinit pingaarnerniit soorlu aalisarnermit aatsitassanillu qalluinermit, sanaartornermit, sullissinermilu inuussutissarsiutini soorlu peqqinnissamut, atuartitsinermut, nujalerisut inunnillu angallassinermut tunisassiornerup nalinga. Inuussutissanik nioqqutissanillu paarlaaqateqartarneq, tassunga ilanngullugu nammineq atugassanik piniarneq aamma ilaatinneqarpoq. Tunisassiornerup tamarmiusup aamma tunisassiassanik akuutissanillu atuinerup tamarmiusup akornanni nikingassutaasa naatsorsornerisigut Tunisassiat Ataatsimut Nalingat nassaarineqartarpoq, tassalu inuussutissarsiutini assigiinngitsuni tunisassiornerni naliusut annertuseriartarnerannut eqqornerusumik nassuiaataalluni. Tunisassiat Ataatsimut Nalingat atuisut suliffeqarfiillu nioqqutissanut sullissinernullu toqqaannartumik akit akilertagaannut (niuerfinni akit) naatsorsorneqartarpoq. Tassunga ilaapput tunisassiornermi eqqussinermilu akileraarutit, assersuutigalugu imigassanut sikaritsinullu akitsuutit. Paarlattuanik tapiissutit ilanngaatigineqartarput, assersuutigalugu nukissiuutinut assartuinermullu tapiissutit. Tunisassiat Ataatsimut Nalingat 2007-mi 11.063 mio. kr.-iuvoq, tassalu innuttaasumut ataatsimut 190.000 kr.-it naligalugu.
Tunisassiornerup pilersitaanik ataatsimut isertitat (BFI) tassaavoq akissarsiortup kiisalu suliffeqarfinnik piginnittut il.il. atorsinnaasaannut isertitanut uuttuutaasoq. Tunisassiornerup Pilersitaanik Ataatsimut Isertitat tunisassiornermut eqqussuinermullu akileraarutit ilanngaatigalugit, tapiissutillu ilassutigalugit, naatsorsorneqartarput, taakku aningaasartaat pisortat pisassarisarmagit akiligassarisarlugillu. 2007-mi tunisassiornermut eqqussuinermullu akileraarutit 692 mio. kr.-isut annertutigipput tapiissutillu 553 mio. kr.-iullutik. Taamaalilluni Tunisassiornerup Pilersitaanik Ataatsimut Isertitat Tunisassiat Ataatsimut Nalingannit annikinnerulaarpoq, tassa 10.924 mio. kr.-iullutik. Innuttaasumut ataatsimut 188.000 kr.-ingajannik naleqarlutik. Tunisassiorneq inuiaqatigiinni kisimi isertitaqarfiunngilaq. Kalaallit Nunaata nunallu allat akornanni arlalinnik aamma nuussisoqartarpoq. Tassani assersuutit pingaarnersaraat Danmarkimiit ataatsimut tapiissutit, kisianni aamma EU-mik isumaqatigiissuteqarnerit Kalaallit Nunaata isertitaqarneranik qularnaarinnippoq. Inuiaqatigiit isertitaasa ataatsimut nalingat inuiaqatigiillu ataatsimut isertitaasa nalingannit atorneqarsinnaasut taamaalilluni inuiaqatigiit atuinermut aningaasaliissutinullu nunanut allanut taarsigassarsiniaqqaaratik atugassaannut nassuiaataavoq.
Inuiaqatigiit ataatsimut isertitaasa nalingat (BNI) nassaarineqartarpoq nunani allani sinniisuutitat akissarsiaannut (ilanngaatit peereerlugit), kiisalu nunani allani sinniisuutitat pisassaasa nalillit isertitaqarfiginerannut (ilanngaatit peereerlugit) Tunisassiat Ataatsimut Nalingannut iluarsiissutigigaanni. Inissitat taakku ukiumut 242 mio. kr.-inik aningaasartaqarnissaat missiliuunneqartut nunatsinnut tunngillat. Taakkunaniipput inuit Kalaallit Nunaannut sivikinnerusumik suliartortut akissarsiaat (ukioq ataaseq inorlugu), assersuutigalugu peqqinnissaqarfimmi sulisut, akileraarutit atuinermullu aningaasartuutit ilanngaatigereerlugit akissarsiaminnik annissisut. Aammattaaq nunani allani aningaasartuuteqarfiusut ingerlatseqatigiiffiillu taarsigassarsiaannit erniaajunnartut il.il. ilaapput.
Ataatsimut katikkaanni 2007-mi Inuiaqatigiit Ataatsimut Isertitaasa Nalingat 10.821 mio. kr.-iupput. Tassa innuttaasumut ataatsimut 184.000 kr.-inik annertussuseqarlutik.
Inuiaqatigiit ataatsimut isertitaasa nalingannit atorneqarsinnaasut (Disponibel BNI) Kalaallit Nunaannut nuunneqartut (ilanngaatit peereerlugit) Inuiaqatigiit Ataatsimut Isertitaasa Nalingannut ilanngunnerisigut pissarsiarineqartarput, tassalu danskit naalagaaffianit ataatsimut tapiissutit, danskit naalagaaffiata kalaallit nunaanni aningaasartuutai kiisalu aalisarsinnaanermut akuersissutinut atatillugu EU-mit nuussinerit.
2007-mi nuussinerit 3.866 mio. kr.-inik annertussuseqarput, taamaalilluni Inuiaqatigiit Ataatsimut Isertitaasa Nalingannit Atorneqarsinnaasut 14.687 mio. kr.-inik annertussuseqalerput imaluunniit innuttaasumut ataatsimut 250.000 kr.-ingajaallutik. Tunisassiornikkut isertitanut pilersinneqartunut naleqqiullugu nunanit allaniit nuussinerit inummut ataatsimut nuna tamakkerlugu isertitat 60.000 kr.-it missaannik qaffariarput.
Takussutissiaq 1-mi piffissami 2002-2007-mi qulaani taaneqartut ataqatigiinnerat takuneqarsinnaavoq. Sukumiinerusumik allaaserisaqarneq Tabel uani nassaarineqarsinnaavoq.
Takussutissiaq 1
BFI, BNI aamma BNP
|
|
|
2002 |
2003 |
2004 |
2005 |
2006 |
2007 |
|
|
|
Mio. kr. |
|
|
|
|
|
|
1 |
BNP |
9.223 |
9.397 |
9.855 |
10.112 |
10.636 |
11.063 |
|
2 |
Nioqqutissianut akileraarutit |
655 |
595 |
628 |
665 |
658 |
692 |
|
3 |
Nioqqutissianut tapiissutit |
654 |
593 |
570 |
624 |
564 |
553 |
|
4 |
BFI (1-2+3) |
9.222 |
9.395 |
9.797 |
10.071 |
10.542 |
10.942 |
|
5 |
Sulisut akissarsiaat pigisanillu isertitat nunanit allanit, ilanngaaseriikkat |
242 |
242 |
242 |
242 |
242 |
242 |
|
6 |
BNI (1+5) |
8.981 |
9.155 |
9.613 |
9.870 |
10.394 |
10.821 |
|
7 |
Nunanit allanit nuussinerit, ilanngaaseriikkat |
3.474 |
3.638 |
3.608 |
3.662 |
3.766 |
3.866 |
|
8 |
BNI-mi atorneqarsinnaasut (6+7) |
12.455 |
12.793 |
13.222 |
13.531 |
14.160 |
14.687 |
Najoqqutaq: Naatsorsueqqissaartarfik